સુરતમાં સિક્યુરિટી ગાર્ડ તરીકે ફરજ બજાવતા શૈલેશ ના અંગોનું દાન કરાયું, ચાર વ્યક્તિને મળ્યું નવું જીવન..
ઝારખંડના રહેવાસી અને હાલમાં ONGCમાં સિક્યુરીટી ગાર્ડ તરીકે ફરજ બજાવતા બ્રેઈનડેડ શૈલેશ હરિહર સિંઘના પરિવારે તેમના હૃદય, કિડની અને લિવરનું દાન કરી ચાર વ્યક્તિઓને નવું જીવન આપી માનવતાની મહેક ફેલાવી સમાજને નવી દિશા બતાવી છે.
સુરતથી અમદાવાદનું 285 કિ.મીનું અંતર 80 મીનીટમાં પૂરું કરીને હૃદયનું ટ્રાન્સપ્લાન્ટ જામ ખંભાળિયાના રહેવાસી 22 વર્ષીય યુવકમાં અમદાવાદની સીમ્સ હોસ્પીટલમાં કરવામાં આવ્યું છે. આ યુવક છેલ્લા બે વર્ષથી હૃદયની બીમારીથી પીડાતો હતો અને છેલ્લા ત્રણ મહિનાથી તેના હૃદયનું પમ્પીંગ 5% થી 10% જેટલું થઇ ગયું હતું. જેને હ્રદય મળતાં નવું જીવન મળ્યું છે.
અકસ્માત થતા શૈલેશને બ્રેઈનડેડ જાહેર કરાયેલો
શૈલેશ ને હાલમાં રોડ અકસ્માતમાં મગજમાં ગંભીર ઈજા થતા સુરતની નવી સિવિલ હોસ્પિટલ અને ત્યારબાદ સનશાઈન ગ્લોબલ હોસ્પિટલમાં દાખલ કરવામાં આવ્યો હતો. ત્યાં થોડા દિવસની સારવાર પછી ડોક્ટરોએ તેને બ્રેઈનડેડ જાહેર કરતા તેની પત્ની સીમા અને તેના ભાઈઓએ શૈલેશ સિંઘના અંગદાનનો નિર્ણય લીધો હતો. શૈલેશ સિંઘનું હદય, બે કિડની અને લિવરનું દાન ડોનેટ લાઈફના માધ્યમથી કરવામાં આવ્યું છે. જેની મદદથી ચાર જરૂરિયાતમંદ દર્દીઓને નવજીવન મળ્યું છે.
કિડની અમદાવાદ મોકલાઈ
સુરતની સનશાઈન ગ્લોબલ હોસ્પિટલથી અમદાવાદની IKDRC હોસ્પિટલ સુધીનું 271 કિ.મિ નું અંતર 240 મીનીટમાં કાપીને દાનમાં મેળવવામાં આવેલા લિવરનું ટ્રાન્સપ્લાન્ટ રાજકોટના રહેવાસી 41 વર્ષીય વ્યક્તિમાં અમદાવાદની IKDRC હોસ્પિટલમાં ડૉ.પ્રાંજલ મોદી અને તેમની ટીમ દ્વારા કરવામાં આવ્યું છે.
જયારે દાનમાં મેળવવામાં આવેલી બે કિડનીઓ માંથી એક કિડનીનું ટ્રાન્સપ્લાન્ટ અમદાવાદની IKDRC માં અને બીજી કિડનીનું ટ્રાન્સપ્લાન્ટ અમદાવાદની કે.ડી. હોસ્પીટલમાં જરૂરિયાતમંદ દર્દીઓમાં કરવામાં આવ્યું છે.
બે ગ્રીન કોરીડોર કરાયા
લિવર, હ્રદય અને કિડની સમયસર અમદાવાદ પહોંચાડવા માટે બે ગ્રીન કોરીડોર બનાવવામાં આવ્યા હતા. જેમાં સુરત શહેર પોલીસ તેમજ રાજ્યના વિવિધ શહેર અને ગ્રામ્ય પોલીસનો સહકાર લેવામાં આવ્યો હતો. ઉલ્લેખનીય છે કે કોવીડ ના કારણે બીજી લહેર પછી આખા દેશમાં અંગદાનનું પ્રમાણ ખુબજ ઓછું થયું છે.
ત્યારે ડોનેટ લાઈફ દ્વારા છેલ્લા દોઢ મહિનામાં છ બ્રેઈનડેડ વ્યક્તિઓના પરિવારજનો સાથે સમજણ કેળવી 3 હૃદય, 12 કિડની, 2 ફેફસાં, 6 લિવર અને 8 ચક્ષુઓ સહીત કુલ 31 અંગો અને ટીસ્યુઓના દાન મેળવી દેશના વિવિધ રાજ્યોના કુલ 30 ઓર્ગન નિષ્ફળતાના દર્દીઓને અપાયા છે.
